Akademija Svobodnih Putovan' (po ruski Академия Вольных Путешествий, АВП) je rosijsko neoficiaľno společenstvo entuziastov-putnikov, putujučih glavno avtostopom i pešo. Bilo osnovjeno v 1995 v Moskve, Rosija Antonom Krotovim. Regioni putovan' jesut Rosija, Evropa, Azija, Afrika.
Celi společenstva[]
1. Sobiranje informacii o obkružajučom svete, o krainah i regionah i ih čertah i osobenosťah;
2. Organizacija avtostopnih ekspedicij i peših turov v rozličnih regionah Rosii i sveta;
3. Rozprostranjenje informacii o osobenosťah obkružajučogo sveta i možlivosti samostojnih putovan'.
Sposobi putovanja[]
Člen "Akademii" s'a zove "svobodni putnik". Obično "svobodni putnik" ne upotrebja hoteli, kempingi, samoleti i putovne agencii. Obično sredstvo putovanja je libokaki prohodžuči transport, imajuči svobodno mesto i želajuči vezť putnika (často bezplatno ili za malo grošov). Nočuje putnik vne doma ili v dome togo, kto hoče jego ugostiť. Najviše vremeno putnik spoznava s'a s ľuďami, dľa ktorih komunikacii s putnikom ne jesut oplačenoju služboju. Obično, menej grošov - više vremeni treba dľa putovanja; više grošov - više možlivosť doideť šibko. Nočovanje s obitateľami regiona putovanja pokazuje ih žitje, dava polnu i pravdivu informaciju, ale ne obraz iz turističkogo priručnika.
Ekspedicii[]
Najviše znanimi jesut ekspedicii Akademii, otvorjajuče nove puti i nove regioni, gde predže svobodne putniki ješče ne bili.
- Magadan. Letom 1996 A. Krotov i A. Vinokurov putovali prez celu Rosiju od Moskvi do Jakutska i dalej do Magadana (20 000 km).
- Kaspijsko koľce. Letom 1997 A. Vinokurov i A. Stepanov v pervi raz posle 1991 goda putovali okolo Kaspijskogo morja po puti Moskva - Taškent - Ašgabat - Turkmenbaši - Baku - Tbilisi - Moskva (10 000 km).
- Transpoľarna železnica Letom 1998 sedem človeki dosjagnuli groda Nadym, odkud vistupili v pešo putovanje vdolž Budovanja stoletja vremeni Stalina - Transpoľarnoj železnice, vibudovanoj silami vezenjov v 1949-53, pozdnej ostavjenoj.
- Perva Afrikanska ekspedicija. Nemalo 20 000 km po drogam Turcii, Sirii, Jordanii, Egipta i Sudana prošli v 1999 učastniki AVP A. Krotov, P. Marutenkov, A. Petrov, V. Šarlajev, K. Šulov, A. Kalancev.
Svobodna enciklopedija[]
Svobodna enciklopedija (po ruski Вольная энциклопедия, ВЭ) je projekt, ceľu ktorogo jest sobiranje informacii o grodah, selah, avtocestah i prehodah granici dľa svobodnih putnikov (avtostopnikov). Koordinator projekta je Anton Krotov, ale libokto može poslať statju ili dodať libokaku upotrebiteľnu informaciju. Tutden' juž više než 100 človeki učinili vklad v rozvijanje enciklopedii. Kniga bila pečatana v 1998, 2000, 2002 i v dvuh delah (Rosija i bivši SSSR) v 2005, tož i knigi o Azii (2005) i Afrike (2007).
Enciklopedija ima toľko praktičku informaciju: vizi, puť, transport, ceni, možlivosť nočovanja, kormjenje, policija, činovniki, obitateli, jazik, zanimlivosti, kontakti i t.d. Enciklopedija ne ima istorii, fotografij, kontaktov drogih hotelov i putovnih agencij, toľko sposobi deševogo prebivanja i putovanja.