| Кирилица: Валдемар Росенбергер |
Valdemar Rosenberger (1848-1918) byl tvoritelj umětnogo jezyka Idiom Neutral.
Valdemar Rosenberger (Vladimir Karlovič Rozenberger) urodil se v 1848 godě v gradě Sankt Petersburg (Rosija) kako Rus nemeckogo poizhodženija. Byl školjeny kako inženier želězničstva i rabotal v toj funkciji od 1873 do svojego pensionerstva v 1909.
V 1886 godě on naučil se jezika volapük a v 1892 stal direktor Akademije Volapüka. V těh lětah pozicija volapüka byla seriozno zagrožena vslěd uspěhov novogo medžunarodnogo jezyka esperanto. Hočuč reformovati i ulěpšiti volapük, Rosenberger načel eksperimentovati i v 1902 godě iztvoril novy jezyk, Idiom Neutral, naturalističny projekt, kotory jednakže ne byl prijety od medžunarodnogo ruha volapükistov. Deset lět pozdněj, v 1912 godě, Rosenberger opublikoval ulěpšenu versiju togo samogo jezyka pod nazvoju Reform Neutral. V lětah od 1906 do 1915 on izdaval i redaktoval žurnal Progres, prvo na idiom neutral a potom na reform neutral. Pomimo togo, ni prva ni druga versija jezyka ne byla mnogo uspěšna.
V dekembrě 1918 Rosenberger umrěl v věku 70. let vslěd pnevmonije.